පොලීසියට වලංගු නැති ජනපති නිර්දේශ



නීතියට අනුව අත්අඩංගුවට ගන්නා ලෙසට හා ඉන් අනතුරුවද නීතියට අනුකූලව ක‍්‍රියා කළ යුතු බවට ජනාධිපති ගෝඨාභය, සිය ලේකම් මගින් වැඩ බලන පොලිස්පතිවරයාට දැනුම් දුන් බව ජනාධිපති මාධ්‍යය ඒකකය නිවේදනය කර දැනට මසකට ආසන්නව තිබේ.

එහෙත් පොලීසිය මේ උපදෙස් පයිසෙකටවත් ගණන් ගන්නා බවක් පෙනෙන්නට නැත.

පෙරද ජනාධිපතිවරුන් මෙවන් නියෝග උපදෙස් පොලීසියට නිකුත් කළේය. එ සියල්ලම මාධ්‍යය සන්දර්ශන විය. ජනතාව ගොනාට අන්දන්නට නිකුත් කළ ඒවා බව ඔප්පු විය.

පොලිස් ‘‘භිෂණය” රජයේ මත්ද්‍රව්‍ය හා නීති විරෝධී මත්පැන් ජාවාරම් මැඩලීමට මුවාවී, පැතිරෙන්නට පටන් ගෙන ඇති බවක් පෙනෙන්ට තිබේ.

මේ පිළිබඳව අවධානය යොම කරමින් මොරගහහේන පොලීසිය නීත්‍යානුකූලව දිවි ගෙවන රටවැසියකු අධිකරණය උපයෝගී කරගෙන පීඩාවට පත් කරන අයුරු පැහැදිළි කරන සිද්ධියකට අදාළව, එම පුද්ගලයා විසින් කර තිබෙන ලිඛිත පැමිණිල්ලෙන් පැහැදිලි වේ.

01. සභාපතිනිය                
    මානව හිමිකම් කොමිෂන් සභාව       
    අංක 14
    ආර්.ඒ. ද මැල් මාවත
    කොළඹ 04

02. පොලිස්පති                 
     පොලිස් මූලස්ථානය       
     කොළඹ 01

නීති විරෝධී ක‍්‍රියා නිසා, ඔත්තු දුන්න බවට සැක කර හා 119 ට පැමිණිලි කිරීමේ පාපයට පොලීසිය සිදුකරන නීති විරෝධී ක‍්‍රියාවන්ගෙන් ආරක්ෂාව සලසන ලෙසට කරනු ලබන ඉල්ලීම.

අනුර, අවු: 47 යි, ජා.හැ.අ.**, විවාහක, දරුවන් 02 යි, රැුකියාව: වඩු වැඩ, ගොවිතැන. ලිපිනය:මිල්ලෑව. දු.අ. 077**

2020.01.29 වන දින දීය.

2020.01.27 වන දින, රාත‍්‍රී 8.00 ට පමණ, අප පදිංචි ගෙදරට, මීටර් 200 ක් විතර එහායින් පිහිටි අම්මලාගේ ගෙදර ගියා.

මා යන විට, කසුුන් නැමති අයව අල්ලාගෙන, මොරගහහේන පොලීසියේ 5 කු හිටියා. කසුන් ව අල්ලාගෙන හිටියේ, ස්ථානාධිපති. ඔවුන් පැමිණ තිබුනේ ත‍්‍රී රෝද රථයකින්.

මාගෙන්, ස්ථානාධිපති ඇහුවා, ‘‘තෝ බූරුවා ගස්සනවා නේද කියා. මම නැහැ කිව්වාම, ‘‘තොගේ අම්මට හු ........ වා, පර බල්ලා, හු ..... පුතා, ආදී කුණුහරුප කියමින් බැන වදිමින් තොගේ වැඩ අදින් ඉවරයි. හෙට උදේ 8.00 ට මගේ කාමරයට වරෙන් කියා තර්ජනය කළා. ඒ  අතර අම්මා, තවදුරටත්, මා බූරු ගස්සනවා වගේ වැරදි කරන්නේ නෑ කිව්වා. එවිට ස්ථානාධිපති මගේ අම්මාට, ‘‘හු ....... වා, නාකි හු ..... යන වචන කියමින් ‘‘තෝ ගෙට වෙලා හිටිපිය කියා ඇයව පන්නා දැමුවා.

ඊට පස්සේ ‘‘කසුන්” නැමති අයව අත්අඩංගුවට ගත්තා. ඔහුව, ඔවුන්, කසුන්ගේ යතුරුපැදියේ මැද තියාගෙන, පොලිස් නිලධාරීන් දෙන්නෙක් රැගෙන ගියා.

මම, එම නිලධාරීන් පැවසූ පරිදි, උදේ 8.00 ට පොලීසියට ගියා. කසුන් කූඩුවේ හිටියා.

මා ස්ථානාධිපති ළඟට ගියා. ඔහු මගෙන් ඇහුවා, ‘‘තෝ කීයක් තෝන් ගන්නවාද?” කියා. මම කිව්වා, මම බූරු ගහන්නේවත්, ගස්සනනේවත් නෑ කියා. කට වහපිය කියමින් මට කථා කරන්න දුන්නේම නැහැ. ඔහු මට කිව්වා, ‘‘කෝල් එනවා තෝ බූරු ගහනවා කියලා” කියා.

ඔහු මට, ‘‘තෝ උස්සනවා, බෝම්බයක් දාලා හයිකෝට් දානවා කියමින් තර්ජනය කර, දැන් පලයන් කිව්වා.

මම පසුව දැනගත්තේ, කටඋත්තරයක්වත් ගන්නේ නැතිව දවල් 2.00 ට විතර, කසුන්ව මුදාහැරිය බව.

මේ ආකාරයට, මොරගහහේන පොලීසියේ ස්ථානාධිපති හා නිලධාරීන්, මා සමග වෛර බැඳගෙන සිටින්නේ, මීට මාස 6 කට පමණ පෙර, මොරගහහේන පන්සල පිටුපස රබර් වත්තේ පවත්වාගෙන ගිය බූරුපොල පිළිබඳව යමෙක් කරන ලද දැනුම් දීමට මා සැක කිරීමයි.

එම ඔත්තු දීම අනුව, පොලීසිය එම බූරු පොල වැටලූවා. පොලීසිය එම බූරු පොලේ මූලිකයන්ට දැනුම් දී තිබුනා ඔත්තුව දුන්නේ මම බව.

ඉන්පසු මා, ඔත්තු දුන් බවට සැකකර, නිතර නිතර මගේ ගෙදරට පොලීසියෙන් පැන, මම බූරු ගස්සනවාද කියා හොයන්න පටන් ගත්තා.

මා කිසි දිනෙක බූරු ගස්සන්නේවත්, බූරු ගහන්න යන්නේවත් නැත.

බූරු ගසන පිරිස් පොලීසිය හා පවතින සම්බන්ධය උඩ, මේ ආකාරයට මට හිරිහැර කරන බව ප‍්‍රකාශ කරමි.

මීට දින 10 කට පමණ පෙර, ප‍්‍රදේශයේ කුඩු ගසන, සොරකම් කරන, දිලූම් නැමති අය හා සඳුන් නැමැත්තා ගෙදරට පැන ජංගම දුරකථන 02 සොරාගෙන පලා යන ලදි.

මෙම සොරකම ගැන මාගේ බිරිඳ පැමිණිලි කිරීමට, මොරගහහේන පොලීසියට ගියද, පැමිණිල්ල බාර ගත්තේ නැහැ. 119 ට කථා කර පැමිණිලි කළ පසු, පසු දින පැමිණල්ල බාර ගන්නා ලදි. 

අද දින දක්වාම, සැකකරුවන් නිදැල්ලේ සිටී.

දිලූම් නැමති කුඩුකාරයා නිතර පොලීසියට යන එන අයෙකි.

මා ඉල්ලා සිටින්නේ,

නීති විරෝධී ක‍්‍රියාවන් ගැන ඔත්තු ලබාදීම නිසා, මට විරුද්ධව මොරගහහේන පොලීසියේ නීති විරෝධී කි‍්‍රයාවන් නවත්වා, ආරක්ෂාව, හිරිහැරයකින් තොරව ජීවත් වීමට ඉඩ සලසා දෙන ලෙසටය.

මා සඳහන් කළ කරුණු ගැන අවධානය යොමු කර නීතිමය පියවර ගන්නා ලෙසටත්ය.

මෙයට,
අනුර

පොලිස් නීති විරෝධී කි‍්‍රයාවන් වාර්තා වන්නේ අල්ප වශයෙන්ය. එයට හේතු ගණනාවකි. පලක් වේද නැද්ද යන්න ගැන සිත සිතා සිටින්නේ නැතිව සෑම නීති විරෝධී ක‍්‍රියාවක්ම බලධාරීන්ට පැමිණිලි කරන්න. විස්තර ස`දහා විමසන්න 038 2231419

Post a Comment

0 Comments