ශ්රී ලංකා මානව හිමිකම් කොමිෂන් සභාවේ, අධ්‍යාපන හා විශේෂ වැඩසටහන් අධ්‍යක්ෂිකා ශිරාණි රාජපක්ෂ මහත්මිය, මානව හිමිකම් කොමිෂන් සභාව වෙනුවෙන් “ශ්රී ලංකා මානව හිමිකම් කොමිෂන් සභා පනත” සංශෝධනය කිරීම සඳහා යෝජනා ඉල්ලා තිබේ. මෙම යෝජනා ඉල්ලා සිටින්නේ, සිවිල් සමාජ වල ඉල්ලීමකට අනුව බවද කොමිෂම වැඩි දුරටත් කියා සිටී. මෙය හදිසි කටයුත්තක් ලෙසට පිළිගෙන තිබෙන බවද පෙනීයයි.
මෙම කාරණය සම්බන්ධයෙන් ශ්රී ලංකා මානව හිමිකම් කොමිෂමට පිළිතුරු යවන ජනසංසදය වර්තමානයේ අවශ්‍යතාවය සංශෝධන නොව, තිබෙන දෙය රැක ගැනීම බව පෙන්වා දෙයි.
ශ්රී ලංකා මානව හිමිකම් කොමිෂන් සභාවේ ස්වාධීනත්වය ආණ්ඩුක‍්‍රම ව්‍යවස්ථාව මගින්ම අහෝසි කර, ජනාධිපතිවරයා තම අභිමතය පරිදි පනතට පටහැනිව යමින් කොමසාරිස්වරුන් පත්කර තිබීයදිත්, ශ්රී ලංකා මානව හිමිකම් කොමිෂන් සභා පනතට අනුව ආණ්ඩුක‍්‍රම ව්‍යවස්ථාවෙන් ස්ථාපිත කර තිබෙන මූලික අයිතිවාසිකම් කඩවීම් වලදී සහ කඩවීම් වලට අත්‍යාසන්න අවස්ථා වලදී, තවමත් බලාපොරොත්තු සහිතව ශ්රී ලංකා මානව හිමිකම් කොමිෂන් සභාව වෙත ජනතාව යොමු වන අතර, මානව හිමිකම් ආරක්ෂා කිරීම හා ප‍්‍රවර්ධනය උදෙසා ක‍්‍රියා කරන “ජනසංසදය” අඛණ්ඩව ජනතාව මානව හිමිකම් කොමිෂන් සභාවට යොමු කරනු ලබන අතර, වින්දිතයින්ට සහාය දැක්වීම සිදුකරනු ලබන බවද, එම යොමු කිරීම් වලදී සහ ඉන් අනතුරුව පවත්වන විමර්ශන වලදී වින්දිතයින්ට සහන හා අපේක්ෂිත ප‍්‍රතිඵල ලැබෙන අතරම බරපතල ගැටළු හා අපහසුතාවයන්ට ඔවුන් පත්කරනු ලබන බවද ප‍්‍රකාශ කර සිටී.
අත්අඩංගුවට ගැනීමක් කොමිෂම වෙත දැනුම්දුන් විට නොපමාව මැදිහත්වීම මගින් - වධහිංසා පැමිණවීම පමණක් නොව, එයින් ඔබ්බට ගොස් පොලීසිය සිදු කරන නීති විරෝධී ක‍්‍රියාවන්ට මුහුණ දීමට වින්දිතයාට ශක්තිය ලැබේ. දෙවන කරුණ නම්, අයිතීන් උල්ලංඝනයන් පිළිබඳව පැමිණිලි සම්බන්ධයෙන්ද, පවත්වනු ලබන විමර්ශනයන්හී අනුගමනය කරන පිළිවෙත් සහ නිර්දේශ සතුටුදායක මෙන්ම ඉතාමත් නරක ප‍්‍රතිඵල අත්විඳීමට වින්දිතයින්ට සිදුවේ. ශ්රී ලංකා මානව හිමිකම් කොමිෂන් සභා පනත යටතේ දැනට පවතින බලතල ක‍්‍රියාත්මක කරන්නේ නැත.
ඔබ මෙම තත්වය තුළ - ශ්රී ලංකා මානව හිමිකම් කොමිෂන් සභා පනත - සංශෝධනය කිරීමට උත්සාහ දරන්නේ, “ජාතික පොලිස් කොමිෂමට” ආණ්ඩුව සිදු කර තිබෙන දෙයම, කරවා ගැනීමටද යයි ප‍්‍රශ්න කර සිටී.
මේ වන විට එක්සත් ජාතීන්ගේ මානව හිමිකම් කවුන්සිලයේ යෝජනාව - ප්‍රතික්ෂේප කරන බව වගකීමෙන් යුතුව ප‍්‍රකාශ කරන ආණ්ඩුව, ත‍්‍රස්තවාදය වැලැක්වීමේ පනත සංශෝධනය මගින් අසීමිත බලතල ආරක්ෂක අංශ වලටද, දණ්ඩනීති සංග‍්‍රහය සංශෝධනය මගින් පොලීසියට සිය දුෂණ, අක‍්‍රමිකතා, වධහිංසා, පවත්වාගෙන යාමට නීතිමය ඉඩකඩ ලබාදීමට පියවර ගෙන තිබීම මෙහිදී අමතක නොකළ යුතුය. එම නිසා කළ යුත්තේ, ශ්රී ලංකා මානව හිමිකම් කොමිෂන් සභා පනත සංශෝධනය සඳහා කාලය, ශ‍්‍රමය හා ධනය වැය කිරීම නොව, පවතින බලතල යටතේ, කාර්යක්ෂම සේවාවක් ඉටු කිරීමට පියවර ගැනීම බව අවධාරණය කර සිටී.
No comments:
Post a Comment